Auðkúla, kirkjustaður, prestssetur til 1952. Stórbýli, átti m.a. alla Auðkúluheiði og Kjöl suður að Hvítárvatni. Mikið höfðingjasetur á 13. og 14. öld. Séra Jón Jónson (1772– 1817) var prestur á Auðkúlu. Hann var tengdasonur séra Odds á Miklabæ, fjölhæfur og vel látinn. Hann drukknaði í Svínavatni er hann féll í vök á ísnum. Um hvarf hans var eftirfarandi vísa kveðin:
Enginn veit um afdrif hans
utan hvað menn sáu:
Skaflaförin skeifberans
á skör til heljar lágu.
Þótti hann glettast mjög við eftirmann sinn, séra Jón Jónsson Teitssonar biskups. Auðkúlukirkja er lítil, áttstrend timburkirkja.