Baulárvallavatn, gott veiðivatn og alræmt fyrir vatnaskrímsli. Stundum sáust allt að 5 skrímsli í einu sem sóluðu sig á daginn en skreiddust út í vatnið er kvölda tók. Skammt frá vatninu var áður býlið Baulárvellir. Þar bjó um miðja 19. öld Jón Sundmann ásamt konu og börnum. Eitt sinn er bóndi var að heiman heyrði húsfreyja hark mikið sem væri verið að brjóta niður bæinn, auk þess sem kuldagust lagði inn í baðstofuna, en hún þorði sig hvergi að hræra. Morguninn eftir sáust ummerki því að þá var búið að brjóta niður bæjargöng, búr og eldhús en slóð eins og eftir potthlemma sást liggja frá bænum að auðri vök í Baulárvallavatni. Önnur sögn greinir frá því er tröllskessa var að koma úr veiðiför í Baulárvallavatni með silungakippu á baki er hana dagaði uppi á Kerlingarskarði. Skammt norðar eru Hraunsfjarðarvatn og Selvallavatn.