Brennisteinsfjöll, fjallshryggur í Reykjanesfjallgarði og hafa runnið þaðan mikil hraun allt suður til Herdísarvíkur. Eru miklir hraunfossar þar sem hraunflóðin hafa fallið suður af hálendisbrúninni. Áður var talið að hraun þessi væru síðan fyrir landnám en fundist hafa reiðgötur sem hverfa undir hraunið svo að sum hraunin a.m.k. hljóta að vera yngri. Skotinn W.G. Spence Paterson, sem var kennari á Möðruvöllum um tveggja vetra skeið en síðan lengi breskur ræðismaður í Hafnarfirði, stóð fyrir brennisteinsnámi austan fjallanna en það fyrirtæki bar sig aldrei. Alfaraleið milli Hafnarfjarðar og Selvogs lá um Grindaskörð og austan Brennisteinsfjalla að Heiðinni há, og svo þaðan niður hjá Urðarfelli, austan Hlíðarvatns. Þarna eru góðar gönguleiðir, friður og ró.