Hunkubakkar, þaðan var Guðjón Samúelsson húsameistari ríkisins (1887–1950). Þar hjá hefst leið (42 km) inn að Laka og eldstöðvum þeim sem við hann eru kenndar á Síðumannaafrétti. Leiðin liggur upp hjá eyðibýlinu Heiðarseli, á bakka Selár, en niðri í gljúfrinu er sérkennilegur foss, oft nefndur Slæðufoss. Þorbjörg Jónsdóttir (1903–2002) eiginkona Bruno Schweizer (1897–1958) var frá Hlíðarseli. Bruno, þýskur fræðimaður, ferðaðist um Ísland 1935–36 og tók myndir víða um land sem varpa einstöku ljósi á þjóðhætti á mestu umbrotatímum Íslandssögunnar. Myndir hans og minningar fylla 3ja bindi ritverksins Úr torfbæ inn í tækniöld. Innar liggur leiðin hjá eyðibýlinu Eintúnahálsi, yfir ána Stjórn, upp Hurðarbök, austur yfir Geirlandsá rétt á brún Fagrafoss, austur og norður um Mörtungusker, yfir Hellisá, skammt austan við Blágil, yfir á Galta og í Varmárdal. Leiðin er fær jeppum en Geirlandsá og Hellisá tálma umferð minni bíla.