Gönguskörð, dalur eða skarð upp frá Sauðárkróki, sveigir um suðurenda Tindastóls upp á Laxárdalsheiði. Liggur Skagavegur um hana niður á Laxárdal. Um Gönguskörð lágu fyrrum fjölfarnar leiðir til Húnavatnssýslu, m.a. um Hryggjadal, Víðidal og Litla–Vatnsskarð. Á þessu landsvæði hefur Ferðafélag Skagfirðinga reist tvo gönguskála, Trölla árið 1984 við Tröllafoss, skammt frá eyðibýlinu Trölleyrum, og árið 1995 skála á Þúfnavöllum í Víðidal, á móti svonefndu Litla–Vatnsskarði milli Víðidals og Laxárdals fremri í Húnavatnssýslu. Gönguskarðsá var fyrst brúuð 1875. Var hún hið mesta forað í vatnavöxtum og mannskæð áður en hún var brúuð. Virkjuð 1949. Í Lambárbotnum fyrir ofan Heiði, um 15 km frá Sauðárkróki, er mjög gott skíðasvæði.