Grímsey er græn, grösug og einstaklega gjöful eyja. Útvörðurinn í norðri með auðug fiskimið og litríkt fuglalíf. Frægust er Grímsey trúlega í hugum ferðamanna fyrir heimskautsbauginn og kemur fólk gjarnan langa leið, til þess eins að stíga norður fyrir baug. Saga segir að eitt sinn hafi heimskautsbaugurinn, sem er á örlítilli hreyfingu, legið um mitt hjónarúm oddvitans á Básum. Eyjan er 5,3 km2 að stærð. Hæst er hún 105 metrar og fjarlægð frá “Íslandi” er 41 km. Mannlífið er kröftugt og bjart. Íbúar voru 76, 1.jan. 2012. Grímseyingar eru mikilir gleðimenn sem vinna og skemmta sér af alhug. Höfuðatvinnuvegurinn eru fiskveiðar og fiskverkun. Einn besti íslenski saltfiskurinn er einmitt unninn þar. Myndarlegt félagsheimili Múli, er fjölnotahús. Þar eru 8 bekkir grunnskólans, samkomusalur íbúa, ágætt bókasafn, Eyjarbókasafnið og heilsugæsla. Þrír læknar á Akureyri skiptast á og koma hingað einu sinni í mánuði að sinna heilsufari íbúa. Kirkjan, Miðgarðakirkja var reist úr rekavið árið 1867. Hún er nýendurgerð í upprunalegum litum, fallegt guðshús. Það er Dalvíkurpresturinn sem þjónar þar nú. Góð sundlaug var vígð árið 1989. Eyjabúar versla í versluninni Búðin, sem er einkarekin, þar er gott vöruúrval. Einnig eru tvö gistiheimili, bæði opin allan ársins hring. Grímseyskar handverkskonur opnuðu handverkshúsið Gallerí Sól 1998 og er það opið á ferjudögum yfir sumarmánuðina. Veitingahúsið Krían opnaði árið 2004 og er opin yfir sumartímann. Ferjan Sæfari siglir frá Dalvík til Grímseyjar 3 daga í viku allt árið. Reglubundið flug með Norlandair er þangað, 3 sinnum í viku yfir veturinn en sex daga á sumrum. Grímseyingar hafa sérstakan þjóðhátíðardag 11. nóvember sem þeir halda mikið upp á, en sá dagur er afmælisdagur velgjörðamannsins mikla dr. Daníels Willard Fiske. Dr. Fiske leit Grímsey frá hafi, undraðist að hér byggi fólk og það meira að segja góðir skákmenn. Hann tók eyjuna að hjarta sér og gaf Grímseyingum um aldamótin 1900 þá stærstu peningagjöf, sem Íslendingum hefur verið gefin. Talið er að Grímur bóndi í Grenivík hafi verið fyrstur manna til að reisa sér bú í Grímsey, þegar á tólftu öld. Grímur var sagður bróðir Kolbeins er Kolbeinsey er kennd við. Talið er að goðahof hans hafi staðið á Kirkjuhóli. Grímur vildi láta heygja sig þar sem sæi bæði til hafs og lands. Sagt er að hann sé heygður ásamt konu sinni á klettastapa í Sandvíkurgjögrum. Mikill fjöldi huldufólks er sagður eiga sér bústaði í Grímsey og Nónbrík hýsi kirkju þeirra. Í Prestaskvompu er hellir sem gengur í gegnum Grímsey þvera. Sagan segir að prestur einn hafi farið í rannsóknarferð inn hellinn á báti ásamt 4 mönnum öðrum. Aldrei hafa prestur né fylgdarmenn hans skilað sér til baka.