Hallormsstaður, stórbýli fyrrum, kirkjustaður til 1895, prestssetur til 1880. Merkastur prestur á síðustu öld var Sigurður Gunnarsson (1812– 1878), alþingismaður, læknir og mikilvirkur rithöfundur. Húsmæðraskóli var stofnaður 1930 fyrir forgöngu hjónanna Sigrúnar og Benedikts Blöndals. Hann starfar enn en heitir nú Hússtjórnarskólinn á Hallormsstað. Þá er á Hallormsstað grunnskóli fyrir Upphérað. Þar er hótelrekstur á sumrin sem og í Hússtjórnarskólanum. Tónlistarskóli er í tengslum við grunnskólann. Skógarvörðurinn á Austurlandi hefur haft aðsetur á Hallormsstað síðan 1908 (sjá í umfjöllun um Hallormsstaðarskóg).