Hnausar, býli reist á skriðu er féll úr Vatnsdalsfjalli 1545, kölluð Skíðastaðaskriða en hún tók af bæinn Skíðastaði og fórust þar 14 manns. Um 40 árum síðar var bær reistur þar sem nú eru Hnausar. Jósep Skaftason (1802–75), fyrsti læknir í vesturhluta Norðuramts, sat á Hnausum. Austan við Hnausa er Hnausatjörn sem varð til í skriðunni. Í Hnausakvísl drukknaði séra Þorvaldur Bjarnason, merkisprestur á Melstað, vorið 1906.