Hnjótur, þar er merkilegt minjasafn sem Egill Ólafsson (1925–1999) byggði upp af miklum myndarskap og afhenti svo sýslunni. Þar er að finna einstætt safn merkilegra muna frá nágrannabyggðum. Þar er líka fjöldinn allur af munum sem tengjast atvinnusögu fyrri hluta 20. aldar. Þessir munir veita góða innsýn í lífsbaráttu fólks og þá útsjónarsemi og sjálfsbjargarviðleitni sem fólk varð að beita til að komast af við erfiðar aðstæður. Á Hnjóti er knörr sem notaður var við hátíðahöldin í Vatnsfirði 1974 og nýlega bættist í safnið hluti af skipsflaki sem fannst í Hafnarvaðli og talið er vera frá 1694. Árið 1998 var reist að Hnjóti minnismerki eftir Bjarna Jónsson. Ríkisstjórn Íslands stóð straum af uppsetningu minnismerkisins til heiðurs afrekum íslenskra björgunarmanna við björgun innlendra og erlendra sjómanna úr sjávarháska og til minningar um þá sem ekki varð bjargað.