Húsavík fékk kaupstaðarréttindi árið 1950 .Nafn kaupstaðarins er tilkomið vegna þess að sögur herma að landnámsmaðurinn Garðar Svavarsson hafi haft hér vetursetu og fyrstur norrænna manna reist sér hús hér á landi. Hitaveita hefur verið starfrækt á Húsavík síðan 1973, en hún nýtir hveravatn frá Hveravöllum í Reykjahverfi.
Mikil og ört vaxandi þjónusta er við ferðamenn sem koma aðallega í tengslum við hvalaskoðunarferðir á Skjálfandaflóa en Húsavík er þekkt sem miðstöð hvalaskoðunarferða bæði hérlendis og erlendis. Mjög athyglisvert hvalasafn er á hafnarsvæðinu sem fært hefur fjölda ferðamanna til staðarins.
Í Safnahúsinu sem er staðsett um 300 m frá höfninni er sýning um sambúð manns og náttúru, sjóminjasýning, listsýningar, ljósmyndasýningar, skjalasafn og bókasafn.