Eyrarbakki, hluti Sveitarfélagsins Árborgar, kauptún, íbúar voru 544 1. jan 2012. Íbúar Eyrarbakka stunda vinnu í sveitarfélaginu eða í næstu nágrannasveitarfélögum t.a.m. á höfuðborgarsvæðinu. Fjöldi húsa er frá því um aldamótin 1900. Gaman er að ganga um götur á Eyrarbakka því sögulegur andi svífur yfir bænum á meðan brimið ber ströndina sem er einstaklega stórbrotin. Fjölbreytt menningar– og listalíf er á Eyrarbakka ásamt tjaldstæði, gistihúsum, veitingahúsi, verslun, bensínstöð, grunnskóla, leikskóla og bókasafni. Barnaskólinn á Eyrarbakka og Stokkseyri er elsti barnaskóli landsins frá 1852. Eyrarbakki er forn verslunarstaður niður við ströndina í Flóanum. Frá um 1100 og allt fram á fyrri hluta 20. aldar var höfnin þar sú helsta á Suðurlandi, en mikilvægi hennar minnkaði þegar skip stækkuðu. Blómatími Eyrarbakka var frá miðri 19. öld og á fyrstu áratugum 20. aldar. Íbúar af Suðurlandi komu langar leiðir að, til að versla á Eyrarbakka. Eyrarbakkakirkja var vígð árið 1890. Merkasti kirkjugripurinn er altaristaflan, máluð af Louise drottingu Kristjáns IX konungs Danmerkur. Húsið á Eyrarbakka er eitt elsta hús landsins, reist á vegum einokunarkaupmanna 1765, bjálkahús, flutt tilsniðið til landsins. Það var heimili kaupmanna og starfsfólks Eyrarbakkaverslunar til ársins 1926. Viðbygging, Assistentahúsið, reist 1881 fyrir danska búðarþjóna. Hluti af húsasafni Þjóðminjasafns Íslands frá 1992. Byggðasafn Árnesinga hefur verið með grunnsýningu sína í húsunum frá 1995. Sjóminjasafnið á Eyrarbakka er skammt frá Húsinu. Þar er teinæringurinn Farsæll merkastur gripa. Eyrarbakki leikur merkilegt hlutverk í sögu Landafunda en farmaðurinn Bjarni Herjólfsson var frá bænum Drepstokki á Eyrarbakka. Bjarni sigldi frá Eyrarbakka í átt til Grænlands kringum árið 1000. Hann lenti í hafvillum og kom að landi á meginlandi N–Ameríku, fyrstur Evrópumanna. Nokkrum árum síðar vísaði hann Leifi Eiríkssyni til hinna miklu landa í vestri, eins og þekkt er í Grænlendingasögu. Fuglafriðlandið í Flóa er í Flóagaflsmýri norðvestan við Eyrarbakka, og er varpsvæði fyrir votlendisfugla. Friðlandið stendur lágt; hæð yfir sjávarmáli er aðeins 2 m, gönguleiðir, upplýsingaskilti.