Hvanndalir, dalskvompa milli Ólafsfjarðar og Héðinsfjarðar. Þar er gróið land og býli var þar um aldir. Erfitt var um aðdrætti því illfært er þangað bæði á sjó og landi en sauðland gott. Byggð var ætíð slitrótt og hefur verið í eyði frá því um aldamótin 1900. Um Hvanndali og Hvanndalabjarg hafa myndast margar þjóðsögur, m.a. þjóðsagan um séra Hálfdan á Felli í Sléttuhlíð, er hann fór ríðandi á kölska með Jón bónda í Málmey fyrir aftan sig út allan Skagafjörð og yfir að Hvanndalabjörgum. Á Ódáinsakri í Hvanndölum uxu lífgrös sem gerðu þann ódauðlegan er þeirra neytti.