Hvarfdalur, liggur til suðurs frá Lágheiði og um hann kunnur fjallvegur úr Fljótum til Svarfaðardals um Hvarfdalsskarð. Svarfaðardalsmegin er komið niður að Atlastöðum. Er þessi leið allsæmileg og árið 1936 var heil búslóð flutt þar um norðan úr Fljótum ásamt öllum kvikfénaði, kúm, hrossum og sauðfé. Önnur leið um Hvarfdal í Svarfaðardal og nokkuð styttri er um Sandskarð og Sandárdal. Sandskarð er aðeins um 50 m breitt og hryggur þess örmjór. Þriðja leiðin milli Fljóta og Svarfaðardals er svo um Klaufabrekkur eða Klaufabrekknaskarð. Leiðin af Lágheiði liggur um Klaufabrekknadal og Svarfaðardalsmegin er komið niður í annan Klaufabrekknadal. Vestan Klaufabrekknaskarðs er Gimbrarhnjúkur en austan þess Auðnasýling. Enn er svo stórbrotin fjallaleið suður úr Fljótum og er þá farið um Móafellsdal og Hákamba niður á Heljardalsheiði og ofan í Kolbeinsdal.