Klyppsstaður, kirkjustaður og prestssetur fyrrum. Síðasti prestur þar var sr. Finnur Þorsteinsson (1818–88), afi sr. Jakobs Jónssonar og Eysteins ráðherra. Kirkjan stendur enn uppi og er í sæmilegu ástandi en bæjarhús eru að mestu fallin. Hjá bænum fellur Kirkjuá í snotrum fossi en áin hefur stundum valdið þungum búsifjum. Á aðfangadag 1672 kom krapaflóð úr Kirkjuárgilinu og hreif gaflinn úr baðstofunni en ungur sveinn sem var þar til náms bjargaðist með því að skýla sér undir hnjám prestsins. Sumarið 2009 reisti Ferðafélag Fljótsdalshéraðs 39 manna gönguskála í Stakkahlíð.