Kirkjubær, kirkjustaður og til skamms tíma prestssetur. Þar var prestur Ólafur Einarsson (um 1573–1651), faðir Stefáns skálds í Vallanesi. Kirkjan er bændakirkja, byggð 1851. Fyrir 150 ára afmælið var hún lagfærð verulega og er glæsilegt hús, stílherin og „merkust allra kirkjuhúsa á Austurlandi“. Í kirkjunni er margt fagurra gripa, m.a. prédikunarstóll frá tíð Guðbrands Þorlákssonar á Hólum, (1541–1627).