Klausturskógur (Vatnshornsskógur), sannkölluð náttúruperla sunnan við innsta hluta Skorradalsvatns. Hér er vöxtulegastur náttúrulegur birkiskógur á Vesturlandi með gömlum og stórvöxnum trjám í þéttum skógi sem til stendur að friðlýsa. Botngróður er mikill og fuglalíf við ósa Fitjár er fjölbreytt. Á svæðinu er að finna sjaldgæfar gróðurtegundir. Skógurinn dregur nafn af skógartekju Viðeyjarklausturs. Aðkoma er sunnan Skorradalsvatns um Stóru–Drageyri og Haga. Séu gengnar Síldarmannagötur úr Hvalfirði er komið niður í Skorradal hjá Vatnshorni rétt austan við Klausturskóg. Þjóðskógur.