Fossar, í Fossadal um 2 km suður frá Stafnsrétt, 320 m yfir sjó. Lengi bústaður fjallkónga á Eyvindarstaðaheiði. Þaðan er greiðfær leið fyrir bíla að Aðalmannsvatni og Ströngukvíslarskála á Eyvindarstaðaheiði. Af þessari leið er greiður vegur niður í Blöndudal (sjá 733 Blöndudalsvegur). Skammt frá Fossum er eyðibýlið Kóngsgarður. Þar fæddist Sigurbjörn Sveinsson (1887–1950), höfundur Bernskunnar og fleiri vinsælla barnabóka.