Litlibær, reistur árið 1895 af tveimur vinafjölskyldum, sem bjuggu upphaflega sín í hvorum hluta hússins og var því þá skipt í miðju með þvervegg. Húsið er úr timbri með steinhlöðnum veggjum upp að langhliðum og grasi á þökum. Túnið er afmarkað af steinhlöðnum garði og mælist það um 3 hektarar. Einstaklega vel hefur verið vandað til allra steinhleðslna. Alls munu liðlega 20 manns hafa búið þar á tímabili. Búið var í Litlabæ fram til 1969. Þar fæddist Einar Guðfinnsson, sjá Bolungarvík s. 293. Tóttir eru margar á jörðinni og skammt suður af steinhlöðnum vegg, sem liggur umhverfis túnið, er hringmynduð fjárborg og er hún talin mun eldri en aðrar hleðslur við Litlabæ. Hluti af húsasafni Þjóðminjasafns Íslands frá 1999.