Möðruvellir, höfuðból fornt og nýtt. Þar bjó Guðmundur ríki Eyjólfsson á söguöld. Í byrjun 15. aldar bjó þar Loftur ríki Guttormsson og síðar ýmsir niðjar hans er koma við sögur. Í Möðruvallakirkju er altaristafla gömul, hinn mesti dýrgripur, og klukknaport í kirkjugarðshliði, talið reist um 1780. Það er hið eina sinnar tegundar sem varðveist hefur frá svo gamalli tíð en slík port voru algeng við kirkjur fyrr á öldum. Til er lýsing af klukknaportinu frá árinu 1782 og virðist það hafa varðveist í stórum dráttum í þeirri mynd sinni. Í því hanga þrjár klukkur og er sú elsta frá árinu 1769, sú næsta frá 1799 og sú yngsta er frá árinu 1867. Í vörslu Þjóðminjasafns Íslands frá 1962. Á fáum bæjum í Eyjafirði er fegurri útsýn og hin tignarlegu vesturfjöll njóta sín óvíða betur.