Náttfaravíkur, Víkur undir Víknafjöllum. Landnámabók hermir svo frá að frá skipi Garðars Svavarssonar, sem hafði vetursetu í Húsavík í för sinni til Íslands, hafi slitnað bátur sem í voru maður að nafni Náttfari, þræll og ambátt. Settist hann að í Náttfaravíkum um skeið. Eignaði hann sér síðan land í Reykjadal en hraktist aftur út í Víkur þegar land byggðist. Við Náttfaravíkur er land stórbrotið og hrikalegt en gróður víða mikill og fagur. Þrír bæir voru í Náttfaravíkum, yst Vargsnes, þá Naustavík sem var aðalbýlið og suður í Kotadalnum rýrðarkotið Kotamýrar. Lending var talin góð enda var Naustavík mesta útgerðarstöð í Þingeyjarsýslu á 17. öld. Er sagt að 30 skip hafi gengið þaðan er flest var. Byggð hélst í Náttfaravíkum fram á 20. öld. Naustavík lagðist seinast í eyði árið 1941. Þar stendur enn steinhús sem notað er sem sæluhús.