Ísafjörður, höfuðstaður Vestfjarða stendur við Skutulsfjörð. Áður hét bærinn Eyri og allt fram á seinni hluta 19. aldar stóð þar samnefnt prestsetur, frægt af Píslarsögu síra Jóns Magnússonar (1645–96). Kirkjan frá 1863 skemmdist af eldi 1987. Ný kirkja vígð 1995 á sama stað. Samkvæmt Landnámu, reisti Helgi Hrólfsson bæ sinn á eyrinni og gaf firðinum nafnið eftir að hafa fundið skutul rekinn í flæðarmálinu. Bær hans er talinn hafa staðið á bæjarhólnum þar sem prestsetrið reis síðar.
Fjörðurinn er umkringdur háum og bröttum fjöllum og fjórir dalir, Engidalur, Dagverðardalur, Tungudalur og Seljalandsdalur ganga inn úr firðinum. Þar er og verður framtíðar útivistarsvæði Ísfirðinga. Í Tungudal er stór golfvöllur, skíðasvæði, tjaldsvæði og gönguleiðir um skógræktarlandið. Í Engidal er fyrirhuguð hesthúsabyggð og reiðvellir. Á Seljalandsdal er skíðagöngusvæði með upplýstum brautum og skíðaskála. Innan við eyrina er Pollurinn, ein besta höfn landsins frá náttúrunnar hendi. Bærinn á sér langa sögu og settust kaupmenn að á eyrinni um miðja 16. öld. Í Neðstakaupstað eru fjögur friðlýst hús frá tímum danskra verslunarfélaga, það elsta frá 1757. Hvergi á Íslandi eru eins heillegar og vel varðveittar minjar um verslunarstað frá fyrri öldum. Byggðin á eyrinni tók ekki að vaxa fyrr en með afnámi einokunar og stofnun kaupstaðar árið 1787.
Ísafjörður hefur lengi verið með mestu útgerðarstöðum á landinu. Þar urðu menn fyrstir til að vélvæða báta og veiða rækju. Eins og aðrir staðir sem byggja afkomu sína á vinnslu sjávarfangs, hefur Ísafjörður ekki farið varhluta af breytingum síðustu ára. Sú breyting hefur getið af sér aðrar áherslur og eru nú sterk hátæknifyrirtæki á Ísafirði sem byggja þekkingu sína á áralangri reynslu í sjávarútvegi.
Ísafjörður hefur skapað sér orðspor sem miðstöð sjókajakferða á Íslandi. Ástæða þess eru endalausir möguleikar á kajakferðum um firði og víkur Ísafjarðardjúps, Jökulfjarða og Hornstranda. Borea Adventures býður upp á fjölbreytt úrval ferða sem henta jafnt byrjendum sem vilja kynnast þessari spennandi íþrótt, sem og lengra komnum ræðurum sem eru að leita að meira krefjandi ferðum.