Reykjahlíð, höfuðstaður Mývatnssveitar, landmesta jörð á Íslandi. Nær hún norðan frá Gæsafjöllum austur að Dettifossi og Jökulsá, og inn svo langt sem grös ná, áætluð 6000 km2. Kirkjustaður, prestssetur fyrrum. Hraun rann umhverfis kirkjuna 1729.
Ný kirkja stendur nú utan við hraunið, vígð 1962. Hótel og veitingar, sundlaug, skóli, íþróttahús,9 holu golfvöllur, flugvöllur, tjaldsvæði, bifreiðaverkstæði. Við Mývatn urðu ein langvinnustu eldgos er sögur fara af á Íslandi, Mývatnseldar, á árunum 1724–1729. Eldur var þá uppi á mörgum stöðum og hraunflóð mikið frá gígaröð sem kennd er við Leirhnjúk, sem eyddi þrem býlum og tók af bæinn Reykjahlíð.