Skarð, söguríkt höfuðból fyrr og síðar. Hefur verið í eigu sömu ættar frá 11. öld og sennilega frá landnámsöld. Landnámsmaðurinn Geirmundur heljarskinn, landnámsmaður, sat á Geirmundarstöðum sem eru í túnjaðrinum á Skarði. Mestar sögur fara af Skarði er Björn ríki Þorleifsson, hirðstjóri, og síðar Ólöf Loftsdóttir kona hans réðu þar á 15.öld; eru enn sýnilegar minjar frá þeim tíma, m.a. legsteinn Björns. Kirkjustaður. Í kirkjunni er altaristafla sem talið er að Ólöf ríka hafi gefið og fleira góðra gripa. Frá Skarði eru tvö merk skinnhandrit er bæði heita Skarðsbók, lögbók og helgisögur. Í Skarðsstöð er höfn, verslunarstaður um hríð. Þar í grennd surtarbrandsnáma.