Tindastóll, eitt svipmesta fjall Skagafjarðar, milli Reykjastrandar og Laxárdals, um 20 km langt, hæð 989 m. Brattur að austan með klettum og fjölda tinda og skarða en vesturhlíðin meira aðlíðandi og gróin. Margar þjóðsagnir eru við Tindastól bundnar. Ein er um óskasteininn sem finnast átti í brunni upp af Glerhallavík og fljóta upp á hverri Jónsmessunótt. Matthías Jochumsson valdi sér Tindastól að sjónarhóli til að skyggnast um héraðið í kvæði sínu um Skagafjörð. Einn af básunum utan við Glerhallavík er Baulubás og í honum Bauluhellir niðri við sjávarmál. Átti hann að ná þvert í gegnum fjallið til Atlastaða. Kýr frá Atlastöðum fór í gegnum hellinn og fékk hann nafn af því. Eftir þetta lokaði Hálfdan á Felli hellinum, hafði þar áður verið vettvangur sjóskrímsla. Heimkynni trölla og jötna var í Stólnum. Tröllakóngur bjó í Tindastóli og dóttir hans í glersölum í Glerhallavík. Sonur hennar átti að vera Hálfdan prestur á Felli í Sléttuhlíð og þess vegna kunni hann öðrum fremur tökin á tröllunum í Hvanndalabjargi við Eyjafjörð. Risi mikill átti bú í Tindastóli. Nam hann á brott dóttur Hólabiskups og hafði í helli sínum. Sótti hann til fanga að Drangey og reri þangað steinnökkva miklum. Að sjálfsögðu varð svo mennskur fullhugi til að fella risann og frelsa meyna.