Brokey, stærst eyja á Breiðafirði, er í eyjaklasanum undan Skógarströnd. Mikil hlunnindajörð. Þar voru sjávarföll látin knýja kornmyllu og sjást enn leifar hennar. Meðal ábúenda þar var Jón Pétursson fálkafangari (1584–1667). Á unga aldri var Jón í siglingum og kunni ensku, dönsku og þýsku sem ekki mun hafa verið algengt meðal búandmanna í þá daga. Hann kom á æðarvarpi í Brokey og hóf fyrstur manna að hreinsa æðardún. Jón var 30 barna faðir, hið síðasta átti hann á níræðisaldri. Annar ábúandi var danskur maður, Hans Becker, er var lögmaður yfir Norður– og Vesturlandi á fyrri hluta 18. aldar.