Flói, byggðarlagið milli Ölfusár–Hvítár og Þjórsár upp að Merkurhrauni. Flatlent og víðast hraun undir jarðvegi, Þjórsárhraun, sem einstök holt og hæðir standa upp úr. Þjórsárhraun rann fyrir 8000 árum í gosi á Vatnaöldusvæðinu nálægt Veiðivötnum, á hálendi Íslands. Hraunið er hið stærsta sem runnið hefur á jörðinni eftir ísöld, en það rann um 130 km frá upptökum til sjávar. Stórfelldar áveituframkvæmdir (Flóaáveitan) gerðar er Hvítá var veitt yfir landið 1927. Lengd áveituskurða um 300 km og garðar hálfu lengri, áveitusvæðið um 12 þús. hektarar.