Hoffell, landnámsjörð innst í Nesjum. Landslag umhverfis Hoffell er fjölbreytilegt og fagurt, skriðjöklar, fjallstindar, ár og aurar. Fundist hefur heitt vatn á Hoffelli og eru þar heitar laugar í náttúrulegu umhverfi. Um Goðaborg, 1429 m, eru þjóðsagnir. Því var trúað að borgin væri í raun og veru hús sem goð eða vættir byggðu þótt hún sýndist vera klettur einn. Þannig hafði smali nokkur komið fram hjá Goðaborg þegar hann var að eltast við sauði og voru þá dyr opnar og í þeim stóð grátt naut, ógurlegt ásýndum. Smalanum þótti sem hann væði í viðarlaufum hjá borginni en gaf því ekki frekar gaum fyrr en hann kom út á Setbergsheiði. Þar losnaði skórinn og sá hann að gullpeningur en ekki viðarlauf hafði slæðst í skóinn. Jón Helgason (1727–1809) sýslumaður sótti gull í Goðaborg árlega. Í Hoffelli var numið silfurberg um skeið, auk þess er þar margt fagurra og sérkennilegra steina, svo sem marglitir jaspisar, ópalar, o.fl.