Hveravellir, aðaljarðhitasvæði í Reykjahverfi. Hafa allmörg býli verið reist þar úr upphaflegu landi jarðarinnar Reykja, þar er mikil ylrækt, sundlaug og félagsheimili sveitarinnar. Stærstu hverirnir eru Syðstihver, Uxahver og Baðstofu– eða Ystihver, og er hann þeirra mestur og einn mesti goshver landsins. Lögð hefur verið hitaveita úr Reykjahverfi til Húsavíkur um 18 km leið. Úr Reykjahverfi fellur Mýrarkvísl, sem verður til af nokkrum smærri ám, niður hjá Laxamýri.