Seltjarnarnes, íbúar voru 4.313 1. jan 2012. Á Valhúsahæð voru áður fálkahús konungs og voru þaðan fluttir 200–300 fálkar árlega og hver þeirra fjögurra gæðinga virði. Dregur hæðin nafn sitt af þeim. Fyrsta hringsjá landsins er á Valhúsahæð, víðsýnt. Á hæðinni er rákað berg eftir ísaldarjökul. Í Nesi er Nesstofa, steinhús frá 1763, reist fyrir tilstuðlan hinna dönsku stjórnvalda yfir nýskipaðan landlækni, Bjarna Pálsson. Í húsinu var m.a. apótek og rannsóknarstofa. Árið 1774 var lyfsala aðgreind frá landlæknisembættinu. Í kjölfar þess fékk Björn Jónsson, lyfsali, hálfa jörðina til ábúðar og var Nesstofu skipt á milli þessara embætta. Var sú skipting eftir endilöngu húsinu. Í Nesstofu starfaði einnig ljósmóðir. Húsið komst í einkaeign þegar embættin tvö voru flutt til Reykjavíkur upp úr 1830. Hluti af húsasafni Þjóðminjasafns Íslands frá 1979. Í umsjá Lækningaminjasafns Íslands. Þar fæddist Sveinbjörn Sveinbjörnsson tónskáld (1847–1927), höfundur þjóðsöngsins. Nyrsti hluti Seltjarnarness er friðlýstur fólkvangur, innan hans er Grótta, þar hefur verið sett á stofn náttúrutengt fræðasetur. Í Gróttu er fjölbreytt fuglalíf. Vegna fuglaverndunar er óheimilt að fara um svæðið frá 1.maí–1.júlí. Friðlýst 1940. Bakkatjörn á Seltjarnarnesi hefur einnig verið friðlýst. Tjörnin er strandvatn, en ós hennar var lokað 1960. Fjölskúðugt fuglalíf.