Sólheimar, hét áður Hverakot, vistvænt byggðahverfi; þar var stofnað barnaheimili 1931 af Sesselju Sigmundsdóttur (1902–74), síðar heimili fyrir fatlaða. Elsta samfélag sinnar tegundar í heiminum þar sem fatlaðir og ófatlaðir búa og starfa hlið við hlið. Íbúar voru 92 1. jan. 2012. Þar býr Reynir Pétur Ingvarsson sem frægur varð fyrir „Sólheimagöngu“ sína árið 1985 er hann gekk Hringveginn (veg 1) á 32 dögum til að afla fjár til að reisa íþrótta– og leikhús að Sólheimum. Að Sólheimum er stundaður lífrænn landbúnaður, ylrækt og skógrækt. Þar er einnig að finna listasmiðju, sýningarsal, kaffihús og höggmyndagarð með verkum eftir Ásmund Sveinsson, Einar Jónsson, Ríkarð Jónsson, Gunnfríði Jónsdóttur, Nínu Sæmundsson, Sigurjón Ólafsson o.fl. Sesseljuhús opnað á 100 ára fæðingarafmæli Sesselju, 5. júlí 2002, umhverfishús, byggt úr rekaviði og einangrað með ull, ætlað til ráðstefnuhalds. Einnig var minnisvarði settur upp til minningar um Sesselju. Um helgar á sumrin er alltaf eitthvað skemmtilegt um að vera á Sólheimum. Nánari upplýsingar á www.solheimar.is