Skeggjastaðir, bær landnámsmannsins Hróðgeirs hins hvíta, nú kirkjustaður og prestssetur. Nokkru vestar er sérkennilegur drangur er rís úr sjó, Stapi. Skeggjastaðakirkja er elsta timburkirkja á Austurlandi byggð 1845. Presturinn, séra Hóseas Árnason, borgaði alla smíðina úr eigin vasa en bæði biskup og heimamenn synjuðu honum um aðstoð. Prófasturinn á Hofi í Vopnafirði, séra Guttormur Þorsteinsson, sem átti Skoruvíkurfjörð á Langanesi, gaf rekatréð í kirkjuna. Kirkjan var gerð upp 1961–62 og smíðuð við hana viðbygging með turni.