Surtshellir, í Hallmundarhrauni, um 7 km frá Kalmanstungu. Vegur F578 frá Kalmanstungu er seinfarinn en fær öllum bílum að hellunum. Ugglaust frægastur hella á Íslandi. Hann er rétt við veginn eftir að kemur upp á hraunið. Fjögur niðurföll eru í hann og ekki öll manngeng. Hellirinn er um 1970 m á lengd en um 3500 m með Stefánshelli sem er í beinu framhaldi af honum. Í Surtshelli hafa fundist hleðslur og beinaleifar. Útileguþjófar og ránsmenn, Hellismenn, lágu í hellinum á 10. öld en voru drepnir af byggðamönnum undir forystu helstu höfðingja um ofanverðan Borgarfjörð. Aðrar sögur og frábrugðnar hafa verið gerðar um þá. Samkvæmt Hellismannasögu lágu þeir sofandi í Vopnalág við suðurenda Þorvaldsháls þegar byggðamenn komu að þeim.