Árnes, eyja í Þjórsá. Af henni dregur Árnessýsla nafn, enda var þingstaður hennar þar. Sjást þar leifar af dómhring og örnefni eru þar Gálgaklettar og Þinghóll. Búðartóttir eru flestar vestan árinnar. Víst þykir að áin hafi fyrrum runnið austan við Árnesið og það þá landfast við vesturlandið. Síðar hefur Þjórsá brotið sér farveg vestan eyjarinnar, þar sem meginkvísl hennar fellur nú, í henni er Búðafoss, en Hestafoss í eystri kvíslinni.