Stóri–Langidalur, gengur til suðurs austan Eyrarfjalls. Dalurinn er fagur og grösugur og um hann liðast Langadalsá, veiðiá. Utanvert í dalnum er Klungurbrekka sem dregur nafn sitt af þyrnirós sem vex fyrir ofan bæinn. Fornt heiti rósarinnar er klungur og er þetta eini fundarstaður hennar á Vesturlandi. Um dalinn mun Árni á Ökrum á Mýrum hafa kveðið þessa ástarvísu:
Ætti ég ekki vífa val
von á þínum fundum,
leiðin eftir Langadal
löng mér þætti stundum.
Foreldrar Sir Williams Stephenssonar(1896–1989) bjuggu á Klungurbrekku áður en þau fluttu til Kananda. Talið er að hin sögufræga persóna hvíta tjaldsins, James Bond 007, sé byggð á lífi Williams.