Laufás, prestssetur og kirkjustaður. Kirkjan er frá 1865 byggð af Tryggva Gunnarssyni (1835–1917), síðar bankastjóra, sem fæddist þar og ólst upp. Þar eru ýmsir gamlir gripir, m.a. predikunarstóll frá 1698 og kaleikur frá 1741. Torfbærinn í Laufási er gott dæmi um húsakynni á auðugu prestssetri á síðari hluta 19. aldar. Hann á sér óslitna byggingasögu allt aftur á miðaldir og hefur verið endurbyggður eftir því sem ástæða hefur þótt til á hverjum tíma. Bærinn, eins og hann lítur nú út, varð að mestu til á tímum sr. Björns Halldórssonar (1823–82) sem var prestur og prófastur í Laufási á árunum 1853–1882. Elsta bæjarhúsið er frá 1840 en hin frá 1866–70 en síðast var búið í bænum 1936. Munirnir sem eru í bænum nú eru flestir frá nágrannabæjunum en nokkrir eru þó frá Laufási. Minjasafnið á Akureyri sér nú um starfsemina í bænum. Hluti af húsasafni Þjóðminjasafns Íslands frá 1948.