Laugarbakki, lítið þorp skammt sunnan við Miðfjarðarárbrú. Íbúar voru 45 1. jan. 2012. Þar er grunnskóli, verslun, tjaldsvæði og félagsheimilið Ásbyrgi, sem var fyrsta húsið sem reist var þar. Allt þorpið er hitað með vatni sem kemur frá hverum fyrir ofan Reyki, svo og öll hús á Hvammstanga. Fyrsta hús reist þar 1933. Hét þar áður Langafit, og voru þar hestaöt háð til forna, sbr. Grettis sögu. Í Grettisbóli á Laugarbakka er rekinn sveitamarkaður á sumrin. Þar er einnig handverkshúsið Langafit og gróðurhúsið Skrúðvangur þar sem ræktað er lífrænt grænmeti.