Morsárdalur, dalverpi fyrir innan Skaftafell. Um hann fellur Morsá á breiðum aurum. Göngubrú er á Morsá, inn af Vatnagörðum, sem gerir fólki kleift að komast í Morsárdal og skóginn án þess að fara yfir heiðina. Niður í dalbotninn fellur Morsárjökull, snotur skriðjökull, allt umhverfi sérkennilegt og víða hrikalegt, fullt af andstæðum. Af jöklinum fellur hæsti foss landsins, um 228 m á hæð. Hann hefur ekki enn fengið nafn.