Strandarkirkja, í Selvogi, einu minjarnar um höfuðbólið Strönd, þar sem um skeið bjuggu ríkustu og valdamestu höfðingjar landsins.
Á Strandarkirkju er mikill átrúnaður og reynist hún góð til áheita, enda af því ein auðugasta kirkja landsins.
Núverandi kirkja er frá 1888. Hún var endurvígð eftir endurbætur 14. júlí 1968 og enn endurbætt og endurvígð 13. okt. 1996.
Vorið 1950 var reistur minnisvarði um kraftaverkið í Engilsvík norðvestan við kirkjuna. Er það standmynd á stalli eftir Gunnfríði Jónsdóttur myndhöggvara og nefnist Landsýn. Sýnir hún hvítklædda konu sem heldur á skínandi krossmarki og bendir sjómönnum í lífsháska inn í Engilsvík.
Þjónustuhús var reist nálægt kirkjunni 1988. Í jarðhýsi er snyrtiaðstaða fyrir gesti og gangandi.
Umhverfi kirkjunnar er allt til mikillar fyrirmyndar.