Vatnsskarð, fjallaskarð milli Húnavatnssýslu og Skagafjarðar. Af vesturbrúninni, Botnastaðabrún, er mikið útsýni, einkum inn eftir Svartárdal. Hæst á Skarðinu er Saxhöfði, 441 m sunnan vegar og með tveim vörðum. Þar skammt norðan vegarins er ávöl bunga, 440 m og heitir Víðivörðuás. Þaðan er talið víðsýnt mjög og fagurt í góðu veðri. Skagafjarðarmegin breikkar skarðið og lækkar.